ZAMBALES, Philippines — Nanawagan ang mga operator ng pampasaherong bus sa mga kinauukulang ahensya ng pamahalaan at pamunuan ng pulisya na aksyunang masugpo ang madalas na pambabato sa mga bumibiyaheng bus sa ilang bayan sa lalawigan ng Zambales kung saan nalalagay sa panganib sa buhay ng mga pasahero.
Ang panawagan ay ginawa ni Pocholo Galian, branch manager ng Victory Liner, Inc.-Olongapo City at Zambales makaraang tumaas pa ang bilang ng insidente ng pambabato sa mga pampasaherong bus kumpara noong 2009.
Batay sa reklamo ng mga drayber at konduktor, kadalasang nagaganap ang pambabato sa madidilim na bahagi ng highway sa mga bayan ng San Marcelino, San Antonio, San Narciso at sa bayan ng San Felipe sa Zambales.
Hindi lamang mga pampasaherong bus ang binabato kundi maging mga pribadong sasakyan na maaaring lumusaw sa imahe ng turismo ng nabanggit na lalawigan.
May ilan na rin pasahero ng Victory Liner ang nasugatan sa mga insidente kung saan agad namang nabigyan ng first aid at kompensasyon mula sa kompanya.