MANILA, Philippines - Pinagbabaril hanggang sa mapatay ang tinyente ng Army habang sugatan naman ang babaeng kasama nito sa naganap na panibagong karahasan sa bayan ng Isulan, Sultan Kudarat, ayon sa ulat kahapon.
Napuruhan sa ulo ng bala ng baril si Lt. San tiago Muya, 28, Commandant ng Army’s 46th Infantry Battalion.
Samantala, ginagamot naman sa Tamondong Hospital sa Esperanza, Sultan Kudarat si Mary Jane Ramuar, 23, nagtamo ng tama ng bala sa kaliwang kamay at kaliwang hita.
Naganap ang pananambang sa kahabaan ng highway sa Barangay Impao, bandang alas-11:51 ng umaga.
Lumilitaw na magkaangkas sa pulang motorsiklo sina Muya at Mary Jane nang dikitan at ratratin ng motorcycle-riding assassin na nakasuot ng kulay itim na t-shirts at shorts. Pinaniniwalaang naman mga rebeldeng New People’s Army ang nasa likod ng pamamaslang.