2 kinidnap pinugutan ng Sayyaf

MANILA, Philippines - Dalawa sa tatlong ma­ngangahoy na kinidnap ang pinugutan ng mga bandidong Abu Sayyaf ma­karaang mapagawi sa te­ritoryong pinagtataguan ng teroristang grupo sa ka­gubatan ng bayan ng Ma­luso, Basilan.

Kinilala ang mga pinu­gutan at pinagtataga na sina Daduh Lumatang at Manuel Lumasag.

Sa phone interview, si­nabi ni Task Force Trillium Commander Rear Admiral Alexander Pama, nareko­ber ang bangkay ng mga biktima noong Sabado ng umaga sa magubat at bu­lun­bunduking bahagi ng Sitio Pali, Brgy. Abong-Abong.

Kasalukuyang pinagha­hanap ang isa pang biktima na si Elpidio Aminense na kasamahan na hindi pa rin alam kung ano ang kina­sapitan.

Base sa imbestigasyon, ang mga biktima ay dinukot ng grupo ni Abu Sayyaf Commander Furuji Indama noong Biyernes matapos na matiyempuhang na­ngangahoy sa nabanggit na barangay.

Dahil sa serye ng ope­rasyon ng militar laban sa grupo ni Indama sa Brgy. Sukaten, Sumisip, Basilan ay nagsitakbo ang mga bandido sa bahagi ng Ma­luso, Basilan kung saan natiyempuhan naman ang mga biktima habang na­ngangahoy.

Ayon sa ulat, hindi ka­song kidnap-for-ransom ang pagbihag sa mga bik­tima at posibleng napag­diskitahan lamang pasla­ngin matapos na matiyem­puhan sa lugar.

Posibleng napagka­malang military asset ang mga biktima lalo pa at Kristiyano ang mga ito kaya brutal na pinaslang.