MANILA, Philippines - Napaslang ang isang bisor ng Philippine Long Distance Telephone (PLDT) Company makaraang barilin sa harap ng kanyang pamilya ng ‘di-pa nakilalang lalaki sa Lake Sebu, South Cotabato, kamakalawa.
Napuruhan sa likurang bahagi ng ulo si Ezar Benedict Totesora, 38, may asawa, at residente ng #53 Recto Street, General Santos City.
Sa report ng pulisya na nakarating kahapon sa Camp Crame, naganap ang krimen sa kahabaan ng Falls No. 2, sa Barangay Lake Lahit bandang alas-8 ng umaga.
Lumilitaw na ipinapasyal ng biktima ang kaniyang pamilya sa nasabing lugar nang sundan ng nag-iisang lalaki na armado ng Carbine rifle.
Kasunod nito, umalingawngaw ang malakas na putok ng baril kung saan duguang bumulagta ang biktima habang mabilis namang tumakas ang gunman matapos na matiyak na patay na ang target.
Kabilang sa mga anggulong sinisilip ng mga imbestigador ay ang posibilidad na may kinalaman ito sa trabaho ng biktima.