Motor, sumalpok sa truck: Magkaibigan dedo

CAVITE , Philippines —Patay ang dala­wang magkaibigan nang sal­pukin ng kanilang motorsiklo ang isang mixer truck matapos na mag-overtake sa kahabaan ng Aguinaldo Highway, Brgy Sampaloc 2, Dasmariñas City, kamakalawa ng gabi.

 Kinilala ni P/Supt. Marcos Estrada Badilla, hepe ng pu­lisya ang mga biktima na sina Aries Alcantara, 28 residente ng Blk 4, Lot 94, Sta. Ana Subdivision, Brgy. Mala­gasang, Imus, Cavite at Ryan Regidor, 23 ng Blk 2, Lot 2, Narra St Green City, Subdivision ng nasabi ding lungsod.

Si Alcantara ay idinekla­rang dead-on-the-spot ha­bang si Regidor ay na­matay ha­bang ginagamot sa Asia Me­dic Hospital sa Das­ma­riñas City.

Batay sa imbestigasyon ni PO1 Ronelo Abas may hawak ng kaso, ganap na alas-9:00 ng gabi nang maganap ang insidente. Sakay ang magka­ibi­gan ng motorsiklo na may plate number 3754 Honda XRM at minamaneho ni Al­cantara nang bigla itong mag- overtake at sumalpok sa mixer truck na may plakang ZPL-837 na minamaneho naman ni Diosdado Calvo, 35 ng Brgy Kayquit Indang, Cavite.

Lumilitaw din sa imbes­tigasyon na mabilis ang pag­papatakbo ni Alcantara kung kaya’t hindi na nito nagawa pang umiwas sa kasalubong na truck. Kasalukuyan na­mang nakakulong ang driver ng na­sabing truck habang iniha­handa ang kasong Reckless Imprudence resulting to dou­ble homicide and damage to property.