MANILA, Philippines - Kamatayan ang sumalubong sa apat na sundalo ng Phil. Army, isang election officer at isang poll watcher habang 12 iba pa ang nasugatan makaraang ratratin ng mga rebeldeng New People’s Army ang convoy ng militar na nag-escort sa mga election paraphernalia sa Barangay Mahayhay, Maragusan sa Compostela Valley kahapon ng umaga.
Kabilang sa nasawi ay apat na sundalo ng Army’s 66th Infantry Battalion na pansamantalang ‘di-tinukoy ang pangalan dahil kailangan pang impormahan ang pamilya ng mga ito.
Kinilala naman ang poll watcher na si Mercedita Negro at isang Board Election Inspector na ‘di pa natukoy ang pangalan.
Dinala na sa Camp Panacan Hospital sa Davao City ang mga sugatang sundalo at 3 poll watchers na sina Lita Tablingon, Mila Restauro at Darwin Obillo.
Sa press briefing sa Camp Aguinaldo, sinabi ni AFP-Task Force HOPE spokesman Col. Ricardo Nepomuceno, naganap ang insidente sa kahabaan ng highway ng Sitio Mangga kung saan nagi-escort ang Army’s 66th IB sa pamumuno nina 2nd Lt. Dexter Nabora at 2nd Lt. Florent Casilla
Nabatid na ang grupo ay patungong Maragusan mula sa Mahayahay Elementary School at Paloc Elementary School lulan ng dump truck para ihatid na ang 2 precinct count optical scan machines at iba pang election paraphernalia nang maganap ang pananambang.
Sa kabila ng insidente ay maayos namang nai-deliver ang mga election paraphernalia sa nasabing bayan para sa canvassing.