MANILA, Philippines – Napaslang ang isang bagitong pulis matapos mapagtripang saksakin ng isang maton sa bisinidad ng Barangay Canturay sa Sipalay City, Negros Occidental kamakalawa ng madaling-araw. Napuruhan ng patalim sa kaliwang dibdib at ideneklarang patay sa ospital si PO1 Lucin Cajigas, 34, may-asawa, at nakatalaga sa Negros Occidental Provincial Public Safety Management Company. Sa police report na nakarating sa Camp Crame, lumilitaw na nakatayo ang biktima nang lapitan at pagsasaksakin ng suspek na si Rey Salcedo. Pinaghahanap naman ng pulisya ang suspek na sinasabing lango sa alak at bawal na gamot.