CAMP VICENTE LIM, Laguna, Philippines — Hindi na nakapagdiwang pa ng Valentine’s Day ang pangulo ng transport group matapos itong pagbabarilin ng ‘di pa nakikilalang lalaki malapit sa kaniyang bahay sa Barangay Molino 3 sa bayan ng Bacoor, Cavite kamakalawa ng umaga.
Kinilala ni P/Chief Supt. Rolando Añonuevo, Region 4 police director, ang biktimang si Benito Malinis, 50, ng Barangay Molino 3, at tumatayong pangulo ng transport group na may biyaheng Pala-pala Southmall sa Las Piñas City.
Ayon sa police report, nakatayo si Malinis sa gilid ng kalsada ilang metro ang layo sa kanilang bahay nang biglang lapitan at ratratin ng nag-iisang lalaki na sakay ng motorsiklo bandang alas-7:45 ng umaga.
Tatlong tama ng bala ng cal. 45 baril sa dibdib ang tumapos sa buhay ng biktima.
Napag-alamang may ilang miyembro ng asosasyon na sinasabing nagtanim ng galit sa biktima kaugnay sa hindi maayos na pamamalakad sa pa nanalapi.
May teorya ang mga imbestigador ng pulisya na mga hired killer ang nasa likod ng pamamaslang.