MANILA, Philippines - Mistulang sinapian ng masamang espiritu ang isang 24-anyos na ama makaraang mag-amok at tadtarin ng saksak ang kanyang anak na 7-buwang gulang na babae habang apat iba pa ang malubhang nasugatan sa naganap na trahedya sa bayan ng Hinigaran, Negros Occidental noong Lunes.
Kinilala ni P/Senior Inspector Sonny Boy Bernus, hepe ng pulisya sa bayan ng Hinigaran ang suspek na si Joebert Mana-ay ng Sitio Balabag, Barangay Candumarao ng nasabing bayan.
Naganap ang brutal na krimen sa tahanan ng pamilya Mana-ay dakong alauna ng hapon kamakalawa matapos na maghuramentado si Joebert na sinasabing nanlilisik pa ang mga mata.
Kinilala naman ang sanggol na halos magutay ang katawan na si Kin-Kin habang nasa kritikal na kalagayan ang pamangking sina Frederick John, 6; at Francis Art, 5; misis na si Jean at isa pang kamang-anak na si Francis Fernandez, 37.
Kasalukuyang ginagamot sa Corazon Locsin Montelibano Memorial Regional Hospital sa Bacolod City ang mga sugatan.
Pinag-aaralan naman ng pulisya ang pagsasampa ng kaukulang kaso laban sa suspek na sinasabing may pagkukulang sa pag-iisip kung saan ginamit sa krimen ang pait na panglilok sa rebulto. Joy Cantos