MANILA, Philippines - Kamatayan ang sumalubong sa 43-anyos na magsasaka makaraang ratratin ng mga armadong kalalakihan kung saan dinukot pa ang kanyang ka-live-in sa panibagong karahasang naganap sa bisinidad ng Barangay Lacquios sa bayan ngg Arayat, Pampanga kamakalawa ng gabi. Kinilala ng pulisya ang napaslang na si Iden Bonifacio Adona habang pinaghahanap pa ang kanyang ka-live-in na si Anna Lee Agustin, 37, kapwa nakatira sa Purok 7, Brgy. San Juan Bano, Arayat.
Batay sa police report na nakarating kahapon sa Camp Crame, papauwi at lulan ng motorsiklo ang magka-live-in nang harangin at ratratin si Adona pagsapit sa tabing ilog ng nabanggit na barangay. Nagsasagawa na ng follow-up operations ang pulisya. Joy Cantos