MANILA, Philippines - Dalawang insidente ng pagsabog ang yumanig sa magkahiwalay na lugar sa Zamboanga City kahapon ng madaling-araw.
Sa ulat ng pulisya, naganap ang magkakasunod na pagsabog dakong alas-4:10 ng madaling-araw sa Plaza Pershing at Sevilla ng naturang lalawigan, kung saan isang improvised explosive device ang ginamit sa pagpapasabog dito.
Nakakuha din ang mga otoridad ng pulbura ng ammonium nitrate sa mga lugar na pinasabog. Bagama’t walang naiulat na nasawi o nasaktan sa insidente, nagdulot pa rin ito ng matinding takot sa mga residente dito.
Tinitingnan din ang posibilidad na grupo ng Abu Sayyaf ang nasa likod ng naturang pagpapasabog. Inaalam din kung anong triggering device ang ginamit dito. Joy Cantos