MANILA, Philippines - Labindalawa sa 39 pasahero ang iniulat na nasugatan makaraang ratratin ng mga ‘di-pa kilalang kalalakihan ang pampasaherong bus kamakalawa ng gabi sa Zamboanga City, kamakalawa.
Sa ulat ni P/Chief Supt. Angelo Sunglao na nakarating sa Camp Crame, lumilitaw na patungong Pagadian City ang Rural Transit Bus na lulan ang mga biktima nang pagbabarilin pagsapit sa hangganan ng Sitio Tugbungabong sa Brgy. Licomo, Zamboanga City at Zamboanga Sibugay.
Naisugod naman sa Ipil Hospital ang mga sugatang biktima. Kaagad naman naglatag ng checkpoint ang militar sa kahabaan ng national highway habang sinusuyod ng pulisya ang pinangyarihan ng insidente. Ricky Tulipat