Mag-utol dedo sa corned beef

BATANGAS, Philippines – Kumpir­madong namatay ang mag­kapatid na mangi­ngisda matapos malason sa kinaing delatang corned beef habang nangingisda sa karagatan ng Mam­burao, Occidental Mindoro kamakalawa.

Sa naantalang ulat ni P/Supt. Manuel Abrujena, hepe ng San Juan PNP, nakilala ang mag-utol na sina Dennis Alana, 34  at Joel Alana, 22, kapwa re­sidente ng Barangay Nag­saulay, San Juan, Ba­tangas.

Ayon sa ulat, lumaot ang magkapatid na Alana sa Mamburao, Occidental Mindoro noong Biyernes (Nov. 6), bitbit ang kanilang baong pananghalian ka­bilang na ang delatang corned beef.

Pagkatapos mangisda, nakaramdam na sila ng sa­kit sa tiyan, pagkahilo, pag­tatae at pagsusuka ay na­matay si Dennis sa Mam­burao habang si Joel na­man ay naisugod pa sa Batangas Regional Hospital kung saan namatay ma­tapos ang 3-araw, ayon kay Chairman Henry Robledo ng Barangay Nagsaulay.

“Bine-verify pa namin kung ano talaga ang na­ging dahilan ng kanilang pagka­matay kasi may nag­sasa­bing nakakain sila ng isdang may lason o na­kainom ng kontaminadong tubig o yung baon nilang de-latang corned beef,” dagdag pa ni Robledo. Arnell Ozaeta