Resthouse niratrat: Mayor sugatan, 2 alalay dedo

ZAMBALES, Philippines – Dalawa-katao ang iniulat na napas­lang habang dalawang iba pa kabilang na ang alkalde ang nasugatan makaraang ratratin ng dalawang ‘di-pa ki­lalang kalalakihan ang resthouse ng mayor noong Sabado ng gabi sa Sitio Caligit, Barangay Dirita sa ba­yan ng Iba, Zambales.

 Kabilang sa napaslang ay ang dalawang katiwala at alalay na sina Bernie Aba­gon, 38, ng Purok-3, Ba­rangay Amungan; at Malvar Ganayan, 23, na kapwa hindi na umabot ng buhay sa President Ra­mon Mag­say­say Memorial Hospital.

Samantala, sugatan at lig­tas sa tiyak na kamata­yan maliban sa tinamomg sharp­nel sa mukha, dibdib at tagi­liran si Iba Mayor Danilo Pa­moleras, 44, may-asawa ha­bang na­daplisan naman ng bala sa magkabilang binti si Joseph Contreras, 21, ng Purok-5, Sitio Caligit Brgy Dirita.   

Napag-alaman na ma­sayang nagkakasiyahan sina Mayor Pamoleras at kanyang mga mangga­gawa at bisita sa resthouse da­kong alas-7 ng gabi nang na­gulantang ang grupo sa sunud-sunod na putok ng Armalite rifle na nagmu­mula sa bakod na tinatayang may 20 metro ang layo.

Kaagad na bumulagta ang dalawang katiwala ng resthouse habang sugatan naman sina Mayor Pamo­leras at Contreras.

Agad rumesponde ang pulisya sa pangunguna ni P/Insp Gilbert C. Diaz su­balit ‘di na inabutan ang gun­men na lulan ng motorsiklo.

Naglunsad na ng mala­wakang dragnet operation ang mga tauhan ni P/Senior Supt. Rolando B. Felix, kung saan sinusuyod na ang ki­naroroonan ng mga suspek.

May teorya ang pulisya na may kaugnayan sa usa­pin sa lupa ang isa sa motibo ng pamamaril.