BATANGAS CITY – Karit ni kamatayan ang sumalubong sa isang 72-anyos na executive assistant ng city mayor makaraang pagbabarilin ng ‘di-pa kilalang lalaki sa bahagi ng Barangay Calicanto, Batangas City, Batangas kahapon ng umaga.
Dalawang bala ng baril sa ulo ang tumapos sa buhay ni ex- PNP Colonel Juan Faltado ng Barangay Balete, Batangas City, at tumatayo ring close-in-security ni Batangas City Mayor Eddie Dimacuha.
Sa police report na nakarating kay P/Supt Manuel Abu, hepe ng Batangas PNP, kabibili lang ni Faltado ng gamot sa botika sa may Caedo Commercial Complex at papasakay na ng kotseng Mercedes Benz (PAV-456) nang lapitan at ratratin ng gunman bandang alas-9:30 ng umaga.
“Posibleng mga hired killers ang tumira kay Faltado at may kaugnayan sa kanyang personal na aktibidad ang isa sa motibo sa pagpatay sa kanya,” ani Abu. Arnell Ozaeta