MANILA, Philippines - Umaabot na sa 15 sa kabuuang 17 bayan sa Cotabato ang isinailalim na sa state of calamity dahil sa pananalasa ng flash flood dulot ng walang humpay na pag-ulan sa nakalipas na mga araw. Sa ulat ng Regional Disaster Coordinating Council, kabilang sa mga naapektuhan ay ang mga bayan ng Pigcawayan, Pikit, Libungan, Aleosan, Banisilan, Alamada, Midsayap, Kabacan, Magpet, President Roxas, Arakan at ang bayan ng Antipas. Sa pinakahuling tala ng National Disaster Coordinating Council, umaabot na sa 4, 400 pamilya (22,000 katao) ang naapektuhan sa Cotabato habang aabot naman sa 27 barangay sa Cotabato City na may 20,000-pamilya ang naapektuhan ng tubig-baha. Samantala, aabot naman sa 8,000 pamilya ang iniulat na nagsilikas mula sa 10 Barangay sa Sultan Kudarat at Maguindanao matapos rumagasa ang tubig-baha. Samantala, nagpalabas na ng P20 milyong pondo ang Sangguniang Panlalawigan para magamit bilang calamity fund habang patuloy naman ang pamamahagi ng mga relief goods sa mga evacuation center. Joy Cantos