PANGASINAN, Philippines — Brutal na kamatayan ang sinapit ng isang 84-anyos na ina makaraang pagtatagain ng sariling anak na lalaki sa loob ng kanilang tahanan kamakalawa sa Purok V sa Barangay Camanang Riverside sa Urdaneta City, Pangasinan.
Animo’y kinatay na baboy ang katawan ng biktimang si Nemesia Cabanila vda. De Capodoy habang naaresto naman ang suspek na si Miguel Capodoy Jr., 58, dating sundalo ng Philippine Constabulary at sinasabing nawala sa katinuan.
Sa ulat ng pulisya, ang suspek ay may discharge order mula sa pamunuan ng Phil. Constabulary dahil sa mental defect.
Base sa police report, lumilitaw na nag-amok ang suspek sa labas ng kanilang bahay at hinostage nito ang kanyang ina sa loob ng kanilang tahanan gamit ang matalim na itak at patalim.
Sa pakikipagtulungan ng pulisya sa ilang kapitbahay ng mag-ina para mapasuko ang suspek.
Subalit ilang minuto ang nakalipas ay lumabas sa kanilang bahay ang suspek na duguan ang hawak na itak at sinabing pinagtataga niya ang sariling ina sa ’di nabatid na dahilan.
Kaagad naman sinunggaban ng ilang pulisya ang suspek para hindi na makapanakit pa ng ibang kapitbahay kung saan pinag-aaralan kung sasampahan ng kaukulang kaso dahil na rin sa may diprensya sa pag-iisip.