9 sasakyan naisalba sa katayan

BULACAN, Philippines — Siyam na pribadong sasakyan na pinaniniwalaang kinarnap at nakatakdang katayin ang nadiskubre maka­ra­ang salakayin ng mga aw­toridad kamakalawa ang malaking bodega na pi­ nag­tataguan ng mga sa­sakyan sa bisinidad ng Miraflor Subd., Brgy. Burol sa ba­yan ng Balagtas, Bulacan.

Kabilang sa mga sa­sakyang nakatakdang chap-chapin ay ang Spo­r­tivo, 2-Mitsubishi Pajero na may plakang BCW-227 at EVO-223; Izusu High­lander,Volkswagen (BDK-720); Nissan Zafari (TMJ-863), Mitsubishi Eclipse (UNN-901), at Toyota Prado.

Nasamsam din ng mga awtoridad ang iba’t ibang plaka ng mga sasakyan na pinaniniwalaang na chop-chop at nakatakdang ipag­bili sa mga surplus na tin­dahan sa Banawe, Quezon City at sa bayan ng Bacoor, Cavite.

Naaresto naman ang dalawang suspek na sina­sabing kumakatay ng mga sasakyan na sina Mac Reyes y Cabalo, 50, ng Barangay Tabang, Gui­guinto at Jesther Dela Cruz y Javier, 29, ng Santiago City, Isa­bela.

Base sa police report, naunang inalarma ang pag­kawala ng Nissan Ur­van na may plakang ZKE-516 na ki­narnap sa Brgy. Mojon, Malolos City noong Lunes ng gabi.

Sa follow-up operation ng pulisya, namataan ang nabanggit na sasakyan na nakaparada sa pintuan ng bodega kung saan kinum­pirmang may iba pang sasakyan sa loob na naka­takdang katayin.

Dito na sinalakay ng mga awtoridad ang na­bang­git na bodega at na­ diskubre ang mga sa­sakyang kinarnap. – Boy Cruz