MANILA, Philippines - Isang kawani ng LBC na sinasabing pumalag sa holdap ang iniulat na nasawi makaraang barilin ng mga ‘di-pa kilalang kalalakihan kahapon ng umaga sa Mandaue City, Cebu.
Napuruhan ng bala ng baril sa dibdib si Eugenio Agmata, 45, customer associate ng LBC.
Sa ulat ni P/Supt. Orlando Ualat, na isinumite sa Camp Crame, pinasok ng mga armadong kalalakihan ang sangay ng LBC sa commercial district ng nabanggit na lungsod.
Sa inisyal na imbestigasyon, lumilitaw na dalawa sa mga armadong lalaki ang pumasok sa establisyemento habang dalawa pa ang nagsilbing lookout.
Pagpasok sa loob ay agad na nagdeklara ng holdap kung saan ay natiyempuhang si Agmata ay nagbibilang ng pera sa safety vault.
Napag-alamang pumalag si Agmata kaya binaril sa dibdib ng isa sa holdaper.
Dalawang motorsiklo na may plakang GM 2279 at 7753 ang sinasabing ginamit na gateway ng mga holdaper kung saan sinabayan ang pagbubukas ng nasabing establisyemento. (Joy Cantos)