NBI agent na lider ng kidnap-for-ransom gang tugis

MANILA, Philippines - Isang malawakang manhunt operations ang inilun­sad kahapon ng pinagsanib na elemento ng  Police Anti-Crime Emergency Response (PACER) at Criminal Investigation and Detection Group (CIDG) laban sa isang agent ng National Bureau Investigation (NBI) na pinaniniwa­laang lider ng big time kidnap-for-ransom (KFR) gang.

Kinilala ang tinutugis na suspek na si NBI agent III Junnel Malaluan, gayundin ang ka-live-in nito na si  Khaye Macy Mendoza at si  Barani  Memoracion  na po­si­tibong ki­nilala  ng bikti­mang si Sowaib Musa y Tago, 20,  tubong Ma­rawi City, Lanao del Sur at nani­nirahan sa  Block 85, Lot 2, Brgy 188 Tala, Caloocan City.

Ayon kay P/Chief Supt. Raul  Castaneda, director ng PNP-CIDG, si Musa ay  di­nu­kot ng mga suspek na nag­pakilalang mga  tauhan ng Philippine Drug Enforcement Agency (PDEA) sakay ng berdeng Toyota Tamaraw van noong Hunyo 8 sa Phase 2, Malaria, Caloocan City.

Sa loob ng Van inatasan ng mga suspek ang biktima na tawagan ang asawa  at maghanda ng P.3 milyon ransom.

Dahil sa takot ng asa­wang si Raihanei Abusa­mad-Musa  ay nakipag­ta­wa­ran ito sa mga kidnaper at naibaba  sa P.1milyon kung saan ipina­da­la naman sa Western Union sa pangalan ng isang Barani Memora­cion pero hindi pa rin pina­laya ang biktima.

Noong Hunyo 13 ng gabi nakatakas ang biktima kaya naipagbigay-alam sa kinau­ukulan ang insidente kung saan ni-raid naman ang kuta ng mga suspek sa Pasong Bua­ya 2, Imus Cavite.

Naaresto ang dalawa sa limang suspek na sina Ja­ma­rie Arceo at Mildred Dollete na kapwa nanini­rahan sa Pasaje San Miguel, Tarlac City.