RIZAL, Philippines – Dalawang kalalakihan na sinasabing notoryus drug pusher at mga pangunahing suspek sa pagpatay sa isang tabloid reporter at pulis ang iniulat na napaslang matapos makipagbarilan sa pulisya sa isinagawang buy-bust operation kamakalawa sa Barangay Sta. Ana, Taytay, Rizal.
Nakilala lamang ang dalawa sa alyas Mogs at Mon na kapwa miyembro ng Fabu Norma Drug, Kidnapping at Carnapping Group na may operasyon sa Metro Manila.
Base sa police report, nagsagawa ng buy-bust operation ang pulisya laban sa dalawa sa Road 5, Sitio Abnai, Lupang Arenda nang makatunog sa presensya ng mga awtoridad.
Dito na nagkahabulan hanggang sa umabot sa shootout at napatay ang dalawa kung saan nakarekober ang pulisya ng dalawang baril, P200 na mark money na ginamit sa buy-bust at ilang sachet ng shabu.
Sa tala ng pulisya, unang nagsagawa ng anti-drug operation ang pulisya sa nabanggit na barangay noong Hunyo 3 kung saan nasawi ang reporter na si Jojo Trajano na nagsisilbing media witness at si PO2 Virgilio Dela Cruz. Danilo Garcia