MANILA, Philippines – Pinagbabaril at napatay ang isang lider ng militanteng grupo ng hindi pa kilalang mga armadong kalalakihan kamakalawa ng hapon sa Dumaguete City, Negros Oriental.
Ang biktimang si Fermin Lorico, tagapangulo ng Kaugmaon-Kilusan ng Magbubukid ng Pilipinas, ay nagtamo ng tatlong tama ng bala sa likurang bahagi ng kanyang ulo.
Batay sa report, dakong alas-4:00 ng hapon nang maganap ang insidente sa San Jose Extension St., Dumaguete City.
Ayon sa pulisya, kasalukuyan nang isinasailalim sa awtopsya ang bangkay ng biktima at patuloy na nagsasagawa ng imbestigasyon upang matukoy ang nasa likuran ng pamamaslang. (Joy Cantos)