BATANGAS, Philippines
– Napaaga ang karit ni kamatayan sa isang batang lalaki makaraang mabaril ng sariling ama habang nasa loob ng resort sa Tanauan City, Batangas kamakalawa ng gabi. Kinilala ni P/Supt. Willy Atun, hepe ng Tanauan City PNP, ang biktima na si Richard Allen Casalne, pangalawa sa bunsong anak ni Ricardo Casalne, caretaker ng Casita de Jose Resort sa Barangay Bañadero, Tanauan City. Base sa police report, lumitaw na aktong babarilin ni Ricardo ang asong gala na nagkakalat sa kanilang resort nang bigla na lang sumulpot ang kanyang anak at aksidente nitong mabaril sa ulo. Mabilis namang naisugod sa St. Andrews Hospital sa Talisay at inilipat sa Ospital ng Muntinlupa pero namatay din dahil sa maselang lagay. Kasalukuyang nakadetine na si Casalne at nakatakdang kasuhan.
Arnell Ozaeta