Ambush: Drayber ng MMDA official dedo

CAMP VICENTE LIM, Laguna – Karit ni kama­tayan ang sumalubong sa driver ng opisyal ng Metropolitan Manila Development Authority (MMDA) saman­talang sugatan na­man ang 14-anyos nitong anak ma­karaang tamba­ngan ng mga ‘di-pa nakiki­lalang kala­lakihan sa ba­yan ng San Pedro, Laguna kaha­pon ng umaga.

Kinilala ni P/Senior Supt. Manolito Labador, Laguna police director, ang napatay na si Johnny Agbay Dilao, driver ni MMDA Sidewalk Clearing Operations Group head Roberto “Bobby” Esquivel.

Nasa Asian Hospital naman ang nasugatang si Panager Mico Esquivel, anak ni Bobby Esquivel.

Ayon sa police report, ihahatid na sana ni Agbay si Mico sa San Agustin College sakay ng Mitsubishi Pajero (XSX-250) nang umalingawngaw ang su­nud-sunod na putok ng baril sa panulukan ng Balagtas at Juan Luna Street sa Crysanthemum Village, Ba­rangay San Vicente ban­dang alas-6:30 ng umaga

Sa inisyal na ulat, posib­leng puntirya ang matan­dang Esquivel dahil sa mga narekober na leaflets sa crime scene na kinokon­dena ang mga clearing operation sa mga illegal vendor at squatter

“Siguro ang alam ng mga suspek ay sakay si Bobby (Esquivel) sa kan­yang Pajero kaya ito nirat­rat,” paliwanag ni Labador

Mabilis na nakatakas ang mga suspek sakay ng dalawang traysikel na na­rekober naman may ilang kilometro ang layo sa crime scene habang iniimbes­tigahan ang traysikel dray­ber na ginamit sa krimen.

“Posibleng makakali­wang grupo ang may ka­gagawan ng krimen dahil na rin sa nakitang mga leaflet sa area,” dagdag pa ni La­ba­dor.

Patuloy naman ang im­bestigasyon ng mga awto­ridad. (Arnell Ozaeta, Joy Cantos, Ed Amoroso, at Rose Tamayo)