Bank owner dinukot

Isa na namang kaso ng kidnapping ang naitala sa Surigao del Norte maka­raang dukutin  ang may-ari ng ban­ ko ng mga arma­dong kalala­kihan sa Ceni­za Heights Sub­division sa Surigao City noong Miyer­kules ng gabi. 

Kinilala ng pulisya ang biktima na si Johnson Cuiting, owner-manager ng Rural Bank of Placer sa Surigao City.

Sa phone interview, sinabi ni P/Insp. Alejandro Resimo, hepe ng Placer PNP, naitala ang insidente sa pagitan ng alas-9 at alas-10 ng gabi sa ba­hay mismo ni Cuiting sa nasa­bing subdivision.

Base sa police report, ka­sa­lukuyang papasok na si Cuiting sa gate ng kan­yang ta­hanan nang hara­ngin ng mga armadong kalalakihan.

“Papasok na siya ng ba­hay, ‘dun siya inaba­ngan,” pahayag ni Resimo na sinabi pang dinala pa ang biktima sa loob ng kan­yang bahay, kung saan kinuha ng mga kidnaper ang ‘di-pa ma­batid na ha­laga ng alahas.

Matapos pagnakawan, isinakay ng mga kidnaper ang bank owner sa kan­yang sa­sak­yan na tumahak  patungo sa di-pa mabatid na lugar.

Sa isinagawang follow-up operations ng pulisya, nare­kober ang  sasakyan ng bik­tima na inabandona sa kaha­baan ng national highway na sakop ng Ba­rangay Sibog papasok ng bayan ng Placer.

Nagpapatuloy naman ang imbestigasyon ng pu­lisya. Joy Cantos