KORONADAL CITY — Walo-katao ang iniulat na nasugatan makaraang sumabog ang inihagis na granada sa loob ng carnival center sa kahabaan ng Alunan Highway sa Tacurong City, Sultan Kudarat noong Sabado ng gabi.
Lima sa walong biktima na nasa ligtas na kalagayan ay nakilalang sina Nasser Mangingyog, 24; Rio Delgado, 27; Janice Atanoso, 23; Jolyn Francisco, 19 at si Alma Macabodbod, 55.
Tatlo naman sa mga biktima na ngayon ay nasa Sultan Kudarat Provincial Hospital ay sina Pogi Utto, Baldo Paniang at Armand Dingal na nagtamo ng grabeng sugat sa iba’t ibang bahagi ng katawan.
Ayon kay P/Senior Supt. Joel Limson, hepe ng pulisya sa nabanggit na lungsod, ang mga biktima ay nakatayo malapit sa carnival center nang maganap ang pagsabog bandang alas-7:15 ng gabi.
Napilitan naman ang mga opisyal ng lokal na pamahalaan na pansamantalang ipinatigil ang operasyon ng carnival center at ipinag-utos sa pulisya na siguruhin ang kaligtasan ng taumbayan para mapanatili ang katahimikan.
Napag-alamang magdaraos ng patronal fiesta ang nasabing lungsod sa susunod na linggo. (Ramil Bajo at Danilo Garcia)