RIZAL — Inilagay na sa double red alert ang lalawigan ng Rizal matapos mapatay sa pananambang ng mga rebeldeng New People’s Army ang isang alagad ng batas habang kritikal naman ang dalawang iba pa at pagdukot sa tatlong pulis kamakalawa sa bayan ng Rodriguez, Rizal.
Kinilala ang napatay na si PO1 Rickson Aquino habang sugatan naman sina PO1 Michael Taron at PO1 Ricardo Flores.
Samantalang dinukot naman sina P/Insp. Rex Cuntapay, PO1 Alberto Umali at PO1 Marvin Agasen.
Napag-alamang dakong alas-7 ng umaga nang ratratin ng mga rebelde ang grupo ng 418th Provincial Mobile Group habang nagsasagawa ng routine patrol sa bulubundukin ng Sitio Calumpit, sa Barangay Macabud, Rodriguez.
Nauna rito, ay tinangay ng mga rebelde ang garbage truck na pag-aari ng Renz Transport bago sinunog sa bisinidad ng Sitio Calumpit.
“Nakatanggap tayo ng intelligence report na pipilitin alisin sa Rizal ang tatlong pulis na bihag, isasakay sa close van, kaya lahat ng exit point ay naglagay tayo ng checkpoint,” pahayag ni P/Senior Supt. Ireneo Dordas, provincial police director.
Nagsasagawa na nang hot pursuit operation ang pinagsanib na puwersa ng Regional Mobile Group, Provincial Mobile Group at ang 16th Infantry Battalion ng Philippine Army laban sa grupo ni Ka Donato ng KLG 53rd Komite Probinsya Rizal na nagmula sa Laguna at Bulacan. (Edwin Balasa)