Opisyal ng public market itinumba
Tinambangan at napatay ang isang opisyal ng public market habang sugatan naman ang dalawang iba pa kabilang ang isang guro sa panibagong karahasang naganap sa Barangay Sta. Cruz sa Isabela City, Basilan kamakalawa ng gabi.
Sa provincial police report na nakarating sa Camp Crame, idineklarang patay sa Infante Hospital si Basher Hajan, superintendent sa Isabela City Public Market habang ginagamot naman ang kaangkas sa motorsiklong si Jocelyn del Cuesta, isang guro sa pampublikong paaralan.
Sugatan din ang bysander na si Faisar Angging matapos tamaan ng ligaw na bala ng baril.
Sa imbestigasyon, lumilitaw na sakay ng motorsiklo ang dalawang biktima nang sundan ng mga armadong magkaangkas din sa motorsiklo.
Nang makakuha ng tiyempo ay niratrat si Hajan kung saan nadamay si del Cuesta at ang bystander. Joy Cantos
- Latest
- Trending
