Kidapawan City – Dalawa-katao ang iniulat na nasawi habang limang kabataan naman ang nasugatan makaraang ratratin ng mga rebeldeng Moro Islamic Liberation Front (MILF) ang multicab na sinasakyan ng mga biktima sa Brgy. Langayen sa bayan ng Pikit, North Cotabato, kahapon.
Kabilang sa namatay ay sina Osang Ungkay, anak ni Councilor Norodin Ungkay at Aida Musa, 8, kapwa naninirahan sa Brgy. Dungguan at kapwa grade 4.
Kinilala ni P/Insp. Elias Dandan, police chief ng Pikit, ang mga biktimang sugatan at naisugod sa Cotabato Regional Medical Center ay sina Fahad Ungkay, 16; Umba Musa, 10; Emran Musa, 15; Mamalia Noh, 18; at si Longlong Zainah, 19, drayber ng multicab.
Ang mga batang nasawi at nasugatan ay pawang mag-aaral sa Lagundi Elementary School at Lagundi National High School.
Sa inisyal na pagsisiyasat ng pulisya, lumilitaw na patungo sa Brgy. Lagundi ang kulay asul na multicab (YAS871) na pag-aari ni Councilor Norodin Ungkay mula sa Brgy. Dungguan para kunin sana ang alagang baka.
Napag-alamang nakiangkas lamang ang mga biktimang kabataan sa multicab patungo sa eskuwelahan nang tambangan ng mga rebeldeng nakaposisyon sa gilid ng kalsada.
Base sa tradisyon, ang unang araw ng pasukan sa eskuwelahan ay Linggo at kada Biyernes ay araw ng samba kaya walang pasok sa paaralan.
Ayon sa pulisya, posibleng target ng mga rebelde si Councilor Ungkay na inakalang lulan ng multi cab.