Dinukot ng isang armadong lalaki ang foreman ng Masiu, Lanao del Sur sa bayang ito kamakalawa ng umaga.
Kinilala ang biktima na si Claudio Mutia, 71-anyos, residente ng Bacolod, Lanao del Norte.
Batay sa report ng Police Regional Office ng Autonomous Region in Muslim Mindanao, dinukot ang biktima sa Barangay Macompara Apa Mimbalay, Masiu ng lalawigang ito dakong alas-6:00 ng umaga.
Agad namang natukoy base sa testimonya ng mga testigo na si Olawao Mimbantas, 35-anyos at residente ng Barangay Buadiarangca ng nasabing munisipalidad ang responsable sa pagkidnap sa biktima.
Ang biktima ay tinangay ng suspect sa Brgy. Coloyan, Butig, Lanao del Sur na sinasabing pinagtataguan dito.
Pinaniniwalaan namang hindi ito isang kaso ng kidnap for ransom manapa’y bahagi lamang ng vendetta o paghihiganti ng suspek sa biktima. (Joy Cantos)