7 preso itinakas ng NPA

CAMP GUILLERMO NAKAR, Lucena City – Aabot sa pitong preso ang itinakas ng mga rebeldeng New People’s Army sa naganap na pag­salakay sa Quezon Provicial Jail noong Sa­bado ng gabi.

Ayon kay Captain Lea Santiago, Southern Luzon Command (Sol­com) Public Information Officer, pawang naka­suot ng kulay itim na t-shirt na may tatak na Philippine Drug Enforcement Agency (PDEA) at PNP-SWAT markings, nilusob ng mga rebelde ang provincial jail at iki­nulong ang mga guwar­diya matapos madisar­mahan bandang alas-6:15 ng gabi.

Kabilang sa mga pre­song naitakas ay sina Gemma Carag, secretary ng Kilusang Lara­ngan Guerilla (KLG) 42; Cecilia Mondia, Gru­pong Pang-organisa (GP), KLG 42; Noel Santos, secretary ng KLG general headquarters; Gerson Carabio, platoon leader ng Sentro De Grabidad ng KLG 42; Fernando Tawagon, platoon leader ng AKL Plager; Arnold Valencia, miyembro ng Sandata­hang Yunit Propaganda (SYP), Komitee sa Platoon (KSPN) at si Ro­gelio Monteverda, na nahaharap sa kasong murder at inaalam pa kung bakit siya isinama ng mga rebelde sa pag­takas.

Sakay ng apat na van at armado ng mata­taas na kalibre ng baril kabilang na ang M-60 machine gun, nilusob at naitakas ng mga rebelde ang mga preso na tu­ma­gal lamang ng 10-minuto bago nagsitakas sa ibat-ibang direksyon.

Natangay rin ng mga rebelde ang limang baril, shotgun at isang hand­held radio mula sa mga jailguards at sa guwar­dya ng capitol building security na sina Ronaldo Llose at Abner Ramos.

Mabilis namang nag­sagawa ng blocking operation ang mga aw­toridad hanggang sa maharang ang mga ito sa checkpoint sa Ba­rangay Iyam sa Lucena City.

Subalit, imbes na huminto, naghagis pa ng granada ang mga re­belde na ikinasugat nina SPO1 Florencio En­vase, PO1 Darwin Japor at ang dalawang sibil­yang sina Daryl Javier, 12; at Marlon Santos na naisugod naman sa Mt. Carmel General Hospital.

Narekober naman ang  mga sasakyang KIA Pregio (WCR-121), Mitsubishi L300 van (WJA-369), Hyundai saloon na may plakang WSM-627 at motorsiklo.

Napag-alamang sini­bak na ni Quezon Governor Rafael Nantes sina provincial warden Supt. Archimedes Mortiz at ang deputy warden Ma­ximo Manalo, na sina­sabing nag-seminar sa Maynila kasama ang iba pang tauhan nito. (Dag­dag ulat nina Ed Amo­roso at Danilo Garcia)