CAVITE – Walang saplot at halos hindi na makilala nang matagpuan ang katawan ng isang 17-anyos na dalagita sa gitna ng tubuhan sa Barangay Langkaan, Sitio Buisan, Dasmariñas, Cavite kamakalawa ng gabi. Kinilala ni Dasmariñas Police Chief Supt. Marcos Estrada Badilla ang biktima na si Elaine Guyamin ng Sitio Humayao ng nasabing barangay. Nakuha sa tabi ng bangkay ang bag nito at pulang sumbrero, pares ng tsinelas at iba pang mga gamit ng biktima. Sa kasalukuyan ay may pinaghihinalaang suspek ang pulisya subalit pansamantala itong hindi muna pinabanggit ang pangalan para sa gagawing follow-up dito. (Cristina Timbang)
Nene lumutang
LEGAZPI CITY – Isang pitong taong gulang na batang babae na naunang naiulat na nawawala ang natagpuang lumulutang sa dalampasigan ng Barangay Dapdap sa lungsod na ito kahapon ng umaga. Nakilala ang biktima na si Donnalyn Gandol, grade 1 pupil at residente ng Barangay Cabangan sa lungsod na ito. Unang iniulat ng ina na nakilalang si Arlene na ang kanyang anak ay umalis sa kanilang bahay dakong alas-7:45 ng gabi kamakalawa subalit hindi na ito nakauwi. (Ed Casulla)