Sulyap Balita

LIMAY, Bataan – Napaaga ang salubong ni kama­tayan sa isang 24-anyos na inhinyero habang nasa kritikal na kalagayan ang kasama nito makaraang makalanghap ng nakalalasong kemikal sa loob ng pasilidad ng BRC Petron sa bayan ng Limay, Bataan kahapon ng madaling-araw. Kinilala ng pulisya ang nasawi na si Engr. Anthony Jed Reyes ng Barangay Cataning, Balanga City, samantalang nasa Saint Joseph Hospital si Engr. Nicolo Balonzo, 24. Ayon sa ulat, ang dalawa ay natagpuang nakalugmok sa sour-water facilities department kung saan tumagas ang hydrogen sulfide. Kinumpirma naman ng adminis­tration manager na si Fernando Enriquez, na nakalanghap nga ng toxic substance ang dalawa. (Jonie Capalaran)

ORMOC CITY, Leyte – Pinagbabaril hanggang sa mapatay ang isang 34-anyos na obrero ng dalawang lalaki na nagpanggap na pulis sa Sitio Patong, Barangay San Pablo, Ormoc City, Leyte noong Linggo ng gabi. Kinilala ni P/Senior Insp. Federico Sanches, hepe ng PCP3 ang biktima na si Rolly Rosales y Vosotros, isang construction worker at hiwalay sa asawa. Ayon sa imbestigador na si PO3 Gervacio Monares, nagpapaha­ngin sa labas ng kanilang bahay ang biktima nang lapitan at ratratin ng dalawang ‘di-pa kilalang lalaki. Base sa tala ng pulisya, ang naganap na pamamaslang kay Ro­sales ay kahalintulad din ng pamamaslang kina Joshua Dela Rosa at Jerome Panta, na pinagbabaril na­man sa bisinidad ng Isla Verde, District 26 noong Martes ng gabi. (Roberto Dejon)