Isang 17-anyos na binatilyo ang iniulat na nasawi habang sugatan naman ang kasama nito maka raang salpukin ng solon’s van ang motorsiklo ng mga biktima sa national highway na sakop ng Barangay Bil-loca sa Batac City, Ilocos Norte noong Linggo ng gabi.
Sa police report na nakalap ng GMA news, kinilala ng pulisya ang namatay na si Jasper Tariga, 17, habang naisugod naman sa Mariano Marcos Memorial Hospital ang sugatang si Roderick Obien, 17, na kapwa sakay ng motorsiklo mula sa lamay ng kanilang kapitbahay.
Wala namang iniulat na nasugatan sa Toyota Grandia van na sinasakyan nina Ilocos Norte Rep. Roque Ablan Jr., driver na si PO3 Romeo Galit at tatlong iba pa.
Napag-alamang bumabagtas ang van ng solon pauwi sa Laoag City mula sa Maynila nang mahagip ang motorsiklo ng dalawa
Ayon kay P/Supt. Rogelio Gaño, hepe ng Batac City PNP, biglang kumaliwa ang motorsiklo ng dalawa patungo sana sa city proper kaya nahagip ng van.
Kinumpirma naman ng pulisya na walang plaka, ilaw sa harapan at likod ng motorsiklo at wala ring lisensya ang drayber.
Kinumpirma rin ng pulisya na kapwa senglot ang dalawa nang maganap ang road mishap.
Nagkasundo naman ang magkabilang partidos na hindi magsasampa ng mga kaso laban sa isa’t isa, samantalang nangako naman si Rep. Ablan na magbi bigay ng tulong pinansiyal sa pamilya ng naulila.