Arestado ang dalawa sa tatlong lalaki na nagpakilalang mga kagawad ng pulisya at halinhinang gumahasa sa isang 33-anyos na ginang na tatlong buwang buntis kahapon ng madaling araw sa Antipolo City.
Kinilala ang mga naarestong suspek na sina Marlon Sabado, 42; at Elgio Yubri 31, kapwa residente ng Monte Carlo Homes, Barangay Mambugan sa naturang lunsod.
Pinaghahanap pa ng pulisya habang isinusulat ito ang pangatlong suspek na hindi muna pinangalanan.
Nakatakdang kasuhan ng rape ang tatlo dahil sa panggagahasa nila sa biktimang itinago sa alyas na Jinky at residente ng San Mateo, Rizal.
Ayon sa ginawang imbestigasyon ni PO1 Jasmine Menor ng Women’s and Childrens Desk ng Antipolo police, naganap ang krimen dakong ala 1:30 ng madaling-araw sa bahay ng mga suspek.
Nauna dito, naghihintay ang biktima ng masasakyan sa kanilang lugar upang magtungo sa San Mateo nang madaanan siya ng mga suspek sakay ng kanilang kotse.
Nagpakilalang mga pulis ang mga suspek sabay alok sa kanya na makiangkas sa kanila dahil pababa rin sila sa San Mateo.
Matapos makumbinsing sumabay ang biktima sa kotse ng mga suspek ay agad siyang dinala sa isang bahay sa Barangay Mam bugan at doon ay halinhinang ginahasa ng tatlo.
Nakatakas lang ang biktima nang makatulog ang mga suspek. Agad siyang nagtungo sa himpilan ng pulisya na mabilis namang rumisponde at nadakip ang dalawa sa mga suspek.