4 todas sa bakbakan

Madugong kamatayan ang sinapit ng apat na rebeldeng New People’s Army (NPA) habang apat naman ang  nasugatan ka­bilang ang dalawang sun­dalo sa naganap na mag­kakahiwalay na bakbakan sa CARAGA Region kahapon ng umaga at kamakalawa.

Napag-alamang su­mik­lab ang sagupaan noong Sabado sa pagitan ng Reconnaissance Company ng Army’s 30th Infantry Battalion laban sa sampung re­belde sa liblib na bahagi ng Barangay Daywan, Claver, Surigao del Norte.

Tumagal ng 45-minuto ang bakbakan na nagresulta sa pagkasugat ni Pfc Buas na ngayon at nasa Miranda Hospital sa Surigao City.

Sa ulat naman ni AFP-Western Mindanao Command Spokesman Major Armand Rico, nakasagupa naman ng 42nd Division Reconnaissance Company ang grupo ng Front Committee 3 sa bisinidad ng Sitio La­masaya sa Brgy. La Fortuna sa bayan ng Veruela, Agu­san del Sur.

Umabot sa 25 minuto ang palitan ng putok hang­gang sa mapatay ang apat na rebelde base na rin sa salaysay ng mga residen­teng nakasaksi sa sagu­paan.

Nabatid na nasugatan sa mukha si  Pfc Reynante Sacote habang dalawa rin ang sugatan sa mga rebelde na nakita ng tropa ng militar na binitbit ng mga nag­sitakas nilang kasamahan.

Patuloy naman ang operasyon ng tropa ng militar laban sa nagsitakas na mga rebelde. Joy Cantos