JI hideout ni-raid, bomba nasamsam

Sinalakay ng mga awto­ridad ang itinuturing na hideout ng mga teroristang Je­maah Islamiyah kung saan na­katakas ang pa­ngu­­nahing target sa isi­nagawang ope­rasyon sa Barangay Pobla­cion 3, Alaminos, Laguna noong Martes ng gabi.

Iprinisinta sa mga ma­mamahayag nina PNP chief Director General Ave­lino Razon Jr., Interior and Local Government Secretary Ro­nal­do Puno at PNP-Criminal Investigation and Detection Group (PNP-CIDG) Director Raul Casta­ñeda ang mga sangkap na pampasabog na nakum­piska sa raid.

Ayon kay P/Senior Supt. Felipe Rojas Jr., Laguna police director, ang raid ay isi­na­gawa sa bisa ng search warrant na inisyu ni Judge Cesar Mangrobang ng Imus Regional Trial Court kung saan isang tipster ang nag­turo sa safehouse ng JI sa Al Emam Compound.

Tugis na ng mga tauhan ng Criminal Investigation and Detection Group (CIDG) at Laguna police ang panguna­hing suspek na si Khalid Pagayao na hindi pa naman malinaw kung ito ay miyem­bro ng Jemaah Islamiyah na res­ponsable sa mga pagpa­pasabog sa iba’t ibang ba­ha­gi ng mundo at nagpa­pla­nong pasabugin ang ilang em­ba­hada partikular na ang US Embassy sa Metro Manila.

Bagamat wala ang sus­pek sa bahay nito, nasam­sam naman ang 550 pira­song improvised blasting caps, mga Tetryl compound, 2 piraso ng detonating cord at 25-piraso ng time fuse.

Ayon kay Razon, patu­nay lamang na hindi ini­imbento ng mga awtoridad ang bali­tang naglabasan sa iba’t ibang pahayagan kaugnay sa bina­ balak na paghahasik ng tero­rismo ng JI sa Metro Manila.