Nene ginahasa at pinatay sa loob ng eskuwelahan

CAMP SIMEON OLA , Legazpi City – Isang 12 anyos na batang babae ang ginahasa at pinatay ng  dalawang suspek sa Ba­rangay Bara, Milagros, Masbate kahapon ng ma­da­ling-araw.

Nakilala ang biktima na si Celeste Rorado, 12, isang grade 5 pupil at re­sidente ng Sitio Agoho, Ba­rangay Malbag, Cawayan ng naturang lalawigan.

Nadakip naman ng pu­lisya ang mga suspek na sina Lolito Langurayan, 19, may asawa, mangingisda at residente ng Sitio Agua­dahan, Sawmill, Milagros; at Rene Bais, 28, may asawa at residente ng Sitio San Francisco, Barangay Tinago, Milagros.

Ayon sa ulat ng pulisya, ang bangkay ng biktima ay natagpuan dakong alas- 3:00 ng madaling-araw na nakahandusay sa loob ng campus ng Barangay Elem­entary School ng natu­rang barangay.

Nabatid na ang biktima ay naglalakad na  nag-iisa papauwi sa kanyang  ba­hay matapos na ito ay manood ng palabas sa plaza dahil sa kapis­tahan ng naturang ba­rangay.

Nasalubong ng mga suspek sa daan ang bik­tima hanggang kaladkarin nila patungo sa loob ng campus ang bata bago ginahasa at pinaslang.

Napag-alaman na ang biktima ay nagtamo ng saksak, taga at basag ang ulo nito na tinatayang hi­nampas ng bato ng mga suspek upang tuluyang mapatahimik matapos silang makilala nito.

Sa kasalukuyan, ang da­lawang suspek ay naka­kulong sa himpilan ng pu­lisya at inihahanda na ang pagsasampa ng kasong rape with homicide laban sa mga ito. (Ed Casulla)