Truck vs jeepney: 4 babae todas

BATAAN – Apat na sibil­yan ang iniulat na namatay samantalang sampung iba pa ang nasa malubhang kalaga­yan makaraang mag­salpukan ang dalawang sasakyan sa ka­habaan ng highway na sa­kop ng Ba­rangay Rosevelt sa bayan ng Dinalupihan, Ba­taan kahapon ng madaling-araw.

Ayon kay P/Senior Insp. Rogelio Rillon, hepe ng Di­nalupihan PNP, idinek­larang patay sa Jose  Payumo District Hospital ay sina Con­so­lacion Morales, Alvina Bruno at si Ofelia Cano­nesado na pa­wang nakatira sa Sitio Pantog, Barangay Sta. Ju­liana, Capaz Tarlac City ay na­matay naman sa Gor­don Hospital sa Olonga­po City  ha­bang ginagamot at patuloy na­man kinikilala ang isa pang nasawi.

Nasa kritikal na kondis­yon at inoobserbahan sa James Gordon Hospital ay sina Eddie dela Cruz, Darna Evangelista, Edward Bayan, driver, Car­mela dela Cruz, Arlene Bayan, Olive Cano­nesado at Irine Morales habang nasa Jose Payumo Distirct Hospital naman sina Lotsie Morales, Rolando Evangelista at Michele Evangelista.

Ang iba naman sibilyan na nagtamo ng kaunting sugat sa ka­tawan at ligtas sa kapaha­ma­kan ay pinalabas na ng ospital.

Sa imbestigasyon ni SPO3 Julian Macarobo, bina­bagtas ng pampasa­herong jeepney (CXC-300) ni Edward ang kahabaan ng national road mula sa Tarlac patu­ngong Olongapo City nang mag-overtake sa sinu­sun­dang sasak­yan.

Gayon pa man, hindi napansin ng drayber ng jeepney ang kasalubong na cargo truck ng Fedex (FWL-632) ni Danny Baba, 36, ng Meycauayan Bulacan kaya naganap ang trahedya.

Napag-alamang patungo sana sa kapistahan ang mga biktima sa Sitio Poon Bato, Botolan, Zambales nang salubungin ni kamatayan.

 Samantala, overloaded ang jeepney na may lulang 42-pasahero kabilang ang 29-Aeta na karamihan ay mga bata. (Dagdag ulat nina Joy Cantos at Alex Galang)