Ex-pulis, 2 pa tiklo sa Laguna abduction

CAMP VICENTE Lim, Laguna – Tatlong kala­lakihan kabilang na ang dating pulis ang naaresto makaraang akusahan sa kasong abduction sa bayan ng San Pedro, Laguna ka­makalawa ng gabi.

Kinilala ni P/Supt. Jolly Dizon, hepe ng San Pedro PNP, ang mga naarestong suspek na sina PO3 Ed­gardo Marin, dating  miyem­bro ng Lucban police; Engr. Maximo Banaag ng Taya­bas, Quezon at si Enrique Samonte, 37, ng Lucena City.

Ayon sa ulat, ang mga suspek ay pinaniniwalaang sangkot sa pagdukot sa biktimang si Godofredo Salvador Jr., 29, ng Sitio Mali­gaya 1, Barangay San Vi­cente, San Pedro, Laguna.

Sa inisyal na imbestigas­yon, pinasok ng mga suspek ang bahay ni Salvador at isinagawa ang pagdukot sakay ng Isuzu Elf van pa­tungong Cavite.

 “Dinukot ng mga suspek si Salvador para i-salvage matapos pagbintangan ito na nagnakaw ng baterya ng sasakyan na pag-aari ni Samonte,” pahayag ni Col. Dizon sa PSN

Dahil doon, mabilis na nagsagawa ng hot pursuit operation ang San Pedro police sa pangunguna ni P/Senior Inspector Timoteo Arciso hanggang sa masa­gip ang biktima at maaresto naman ang mga suspek mula sa safehouse sa Ba­rangay Nueva, San Pedro, Laguna.

Nahaharap sa kasong abduction, frustrated murder, illegal detention at usurpation  of authority ang tatlong suspek habang nakakulong sa San Pedro police station.