CAMP CRAME – Nangisay at namatay ang isang 58-anyos na magsasaka makaraang makuryente habang nagsasampay ng mga damit sa bakuran ng kanilang bahay sa Barangay Cari-Mayor sa bayan ng Leganes, Iloilo kahapon ng umaga.
Naisugod pa sa West Visayas State University Medical Center, subalit namatay din ang biktimang si Rolando Solicito, tiyuhin ng isang kapitan ng barangay at residente ng nabanggit na bayan.
Napag-alamang nagsasampay ng damit ang biktima nang hindi nito mamalayan na may nakalawit na talop na linya ng kuryente mula sa poste ang kaniyang nahawakan.
Dahil dito ay agad na nagkikisay ang biktima na nabigo na maisalba ng kanyang mga kapitbahay.
Patuloy na iniimbestigahan ng pulisya kung may naganap na foul play sa pagkamatay ng biktima. Joy Cantos