Ina inutas sa palo ng anak

CAMP CRAME — Brutal na kamatayan ang sinapit ng isang 67-anyos na ina sa sariling anak na lalaki makaraang pagpa­pa­luin ng kahoy sa loob ng kanilang tahanan na iki­nasugat din ng kanyang utol na babae sa Cebu, ayon sa ulat kahapon.

Nakilala ang biktima na si Filomena Ortiz Bacaling na nabiyak ang bao ng ulo dahil sa ma­tinding palo ng kahoy ha­bang ginagamot naman sa Vicente Sotto Me­morial Medical Center, ang anak nitong si Norima, 25.

Naaresto naman ng pulisya ang suspek na  si Mario Bacaling, 28, ma­tapos na humingi ng sak­lolo ang mga kapitbahay. 

Sa ulat ng pulisya, na­itala ang krimen noong Bi­yer­nes ng tanghali habang nananghalian ang mag-ina.

 Napag-alamang nag­talo ang mag-ina bago ang krimen kung saan inu­tusan na maglaba ng damit ang suspek na may kapansanan sa pag-iisip. 

Lumilitaw na lalong nagalit ang suspek nang mamataan niyang kuma­kain ang kanyang ina at kapatid na babae na hindi siya kasalo.

Kaya tinungo ng sus­pek ang hapag-kainan saka isinagawa ang kri­men habang natakot naman ang mga kapit­bahay ng pamilya Baca­ling na pasukin ang bahay dahil sa pag-aalalang armado ng itak hang­gang sa masukol ang lalaki.

Nabatid sa imbesti­gasyon na ginagamot ang suspek sa psychiatric ward ng VSMMC dahil sa kapansanan sa pag-iisip at dahil sa pakiusap ng ina ay nailabas naman si Mario kung saan hindi akalain na tatapusin ang buhay ng sariling ina.