7 nalason sa red tide

Dalawang bata ang iniulat na nasawi habang lima pa ang nasa malubhang kala­gayan at inoobserbahan sa pagamutan makaraang ku­main ng tahong na konta­mi­nado ng red tide sa Sor­sogon.

Kinilala sa ulat na ipi­na­dala ng lokal na tan­ggapan ng Department of Social Welfare and Development sa Sorsogon ang mga nasawi na sina Noriel Arellano, 11, at kapatid nitong si Mary Ann, 5, pawang residente ng Tulay, Casiguran sa natu­rang lalawigan.

Isinugod naman sa Sor­sogon Provincial Hospital ma­karaang malason sa tahong ang tatlo sa mga bik­tima na pawang may apel­yidong Arellano at nagnga­ngalang Ariel, Albert at Ar­mand. Ang dalawa pa ay sina Rose Guab, 35 at Nardo Habulin, 32, ng North Pob­lacion, Juban, Sorsogon.

Nagmula umano sa kara­gatan ng Juban ang mga tahong na nakain ng mga biktima. Dahil dito, inutos ng lokal na pamahalaan ng Sorsogon ang pagbabawal ng pagkain ng tahong mula sa karagatan sa naturang lugar.

Samantala, pina-alala­ha­nan ng pamunuan ng Bureau of Fisheries and Aquatic Resources  ang publiko na huwag kakain ng shellfish tulad ng tahong, talaba at halaan na mula sa karagatan ng limang lalawigan.

Ayon sa BFAR,  bawal pa rin ang pagkain ng mga shellfish mula sa baybayin  ng Wawa sa Bani, Panga­sinan; Milagros  Masbate; Sorsogon Bay sa Sorsogon City, Sorsogon; at  Bislig Bay sa Bislig City, Surigao del Sur gayundin sa Hinatuan bay sa Surigao del Sur  dahil ma­taas pa rin ang toxicity level o lason ng red tide sa natu­rang mga baybayin.

Nilinaw ng BFAR na ba­wal ding kainin ang ala­mang na magmumula sa naturang mga lugar na nasa ilalim ng shellfish  ban.

Gayunman, maaari na­mang kainin ang isda, pusit, hipon at alimango na mula sa naturang lugar. Kailangan lamang umanong linising mabuti ang naturang sea­foods laluna ang hasang ng isda bago lutuin upang ’di maapektuhan ang kalusu­gan kapag kinain.  (Edwin Balasa at  Angie dela Cruz)