Trader, driver todas sa ambush!

MALOLOS CITY, Bulacan – Isang negosyante na supplier ng pastillas sa Goldilocks at driver nito ang nasawi samantalang isa pa ang nasugatan matapos na tambangan at pagbabarilin ng tatlong lalaki sa bayan ng San Miguel kahapon ng madaling-araw.

Sa kanyang ulat kay Supt. Jesus Gatchalian, OIC provincial police director, kinilala ni Supt. Rommel Salac, hepe ng pulisya ng San Miguel ang mga biktima na sina Francisco dela Cruz, 34, isang businessman at driver nito na si Alex Placio, 34, kapwa residente ng Brgy. Buliran, San Miguel.

Nasugatan naman ang isa pang biktima na si Arnel Ramos, 31, pahinante ng truck at residente Brgy. Sta. Ines bunga ng isang tama ng bala sa binti.

Batay sa imbestigasyon ng pulisya, nakasakay sa isang Isuzu Elf truck na may plakang WKP 778 patungong Maynila ang mga biktima upang maghatid ng produktong pastillas sa Goldilocks nang harangin ng isang owner type jeep na may sakay na tatlong armadong lalaki sa Brgy. Buliran bandang ala-1:30 ng madaling-araw kahapon.

Ayon kay Salac, pagtigil ng truck, agad na bumaba sa jeep ang tatlong suspek at walang sabi-sabing pinaputukan ang mga biktima. Namatay noon din si dela Cruz samantalang si Placio ay namatay bago umabot sa pagamutan.

Ayon kay Gatchalian, hindi robbery ang motibo ng pananambang dahil walang nabawas sa produktong dala ng mga biktima. Nakarekober ang pulisya ng 21 basyo ng bala mula sa kalibre .45 pistola sa lugar. (Dino Balabo/Boy Cruz)