Kinilala ni Senior Inspector Aldrin Abila, hepe ng Los Baños PNP ang biktimang si Renato del Valle, 39 at residente ng Sitio Sipit, Barangay Sto. Domingo, Bay, Laguna.
Ayon sa report, naglalakad ang biktima papasok ng kanyang trabaho kasabay ang iba pang kasamahan nang bigla na lang pagbabarilin ng dalawang suspek sakay ng isang motorsiklo pagdating sa Barangay Maahas, Los Baños, Laguna bandang alas-6:30 ng umaga.
Hindi na umabot ng buhay si del Valle sa Pagamutang Pang-Masa ng Laguna matapos magtamo ng apat na tama ng bala sa kanyang katawan, ayon kay Dr. Brian Cabigting ng nasabing ospital.
Nakarekober ng apat na basyo ng bala ng calibre 45 ang mga imbestigador sa crime scene samantalang inaalam pa rin ang motibo ng pamamaslang.
Matatandaang pinagbabaril din hanggang sa mapatay noong Lunes ng umaga si Juan Alborida, 46, chief mechanic ng Agricultural Machinery Development Program ng UPLB ng nag-iisang suspek na lulan din ng motorsiko. (Arnell Ozaeta)