Natagpuan ng mga operatiba ng pulisya noong Biyernes sa masukal na bahagi ng national highway na sakop ng Barangay Naguillan ang bangkay ni Concepcion Azurin-Lumanglas, 50, assistant provincial probation officer at residente ng Capitol Hills, Barangay Alibagu, Ilagan, Isabela.
Sa ulat ni Senior Superintendent Judge Santos, Isabela provincial police director, huling namataang buhay ang biktima dakong alas-5:30 ng hapon noong Miyerkules habang isinasakay sa van na may plakang 508 ng pitong kalalakihan.
Sa follow-up operation, agad naman narekober ang van na nakarehistro sa pangalan ng isang pulis-Isabela, samantalang inilihim naman ng mga awtoridad ang mga nasakoteng suspek habang iniimbestigahan ang kaso.
Naniniwala ang pulisya na malaki ang posibilidad na may kinalaman sa trabaho ng biktima ang naganap na insidente. (Victor Martin)