Hepe ng CVO dinedo sa harap ng pamilya

ZAMBOANGA CITY – Pinagbabaril hanggang sa mapatay ng mga rebeldeng New People’s Army (NPA) ang isang hepe ng Civilian Volunteer Organization sa harap mismo ng kanyang pamilya sa liblib na bayang sakop ng Compostela Valley Province, ayon sa ulat ng military.

Binistay ng bala ng malalakas na kalibre ng baril ang biktimang si Joselito Salazar na isa ring village councilman sa Barangay Linda na sakop ng bayan ng Nabuntaran.

Sa ulat ng Armed Forces Southern Command, si Salazar ay nagpapahinga sa sariling bahay kasama ang kanyang pamilya nang pasukin ng mga armadong kalalakihan.

Mismong ang pamilya ng biktima ang nakasaksi sa naganap na krimen.

Nagkalat naman ang mga basyo ng malalakas na kalibre ng baril na narekober ng mga rumespondeng militar at pulisya.

Naniniwala naman ang mga awtoridad na may kaugnayan sa partisipasyon ng biktima sa seguridad ng nabanggit na village laban sa rebeldeng NPA. (Roel Pareño)