4 HMB, nasakote

CABIAO, Nueva Ecija – Apat na kalalakihan na pinaniniwalaang miyembro ng Hukbong Mapagpalaya ng Bayan (HMB) ang naaresto ng mga tauhan ng 309th Police Provincial Mobile Group sa isang checkpoint sa Barangay San Vicente ng bayang nabanggit, noong Miyerkules ng gabi.

Kabilang sa suspek na dinakip ay nakilalang sina Medelito Santos, alyas Edel, ng Barangay Tilapayong, Baliwag, Bulacan; Edwin Aro, alyas Batang, ng Barangay San Vicente, Cabiao; Daniel Simbulan, alyas Puleng at Jayson Ramos, alyas Martin, kapwa naninirahan sa Sitio Duyong, Barangay Conception, San Simon, Pampanga.

Sa ulat ni P/Supt. Rolando Santos, hepe ng 309th PMG kay P/Supt. Roel Obusan, hepe ng provincial intelligence and investigation branch, nabatid na sakay ang mga suspek ng isang kulay asul na Pajero na walang plaka nang masabat sa checkpoint at nakumpiskahan ng apat na baril. (Christian Ryan Sta. Ana)