Nakilala ang biktimang nasawi matapos iligtas ang dalawang kalarong nalulunod na si Mark Anthony Alcanar, grade II at residente ng Zone 1, Bagong Buhay, Centro West, Santiago City.
Samantala, nakaligtas naman sa tiyak na kamatayan at kasalukuyang nasa ospital ang isa pang kasamahan nito na nakilalang si Aldin Ganzon, grade II, na tumulong sa nasawing biktima sa pagliligtas sa mga kalaro.
Ayon sa pahayag ng mga nakasaksi, masayang naliligo ang limang bata kabilang na ang nasawing biktima nang mapansin na nalulunod ang dalawang kalaro.
Agad na sumaklolo si Alcanar, kasama si Ganzon, subalit matapos mailigtas at maiahon mula sa maputik na ilog ang dalawang kalaro ay lumubog naman sa ilog ang biktima hanggang sa maglaho.
Ilang sandali pa ang nakalipas ay namataan na lamang ang bangkay ng itinuturing na bayaning bata na naipit ng kahoy ang paa sa ilalim ng nasabing ilog na naging dahilan, kung bakit hindi na nagawang lumangoy matapos tulungan ang dalawang kalaro.
Ayon kay Ernalyn Alcanar, ina ng biktima, masakit man ang kalooban sa nangyari sa kanyang anak, wala na itong magawa kundi ang tanggapin ang sinapit ng kanyang panganay na anak sa kagustuhang mailigtas ang buhay ng kanyang mga kalaro.
"Lagi ko silang pinagsasabihan na huwag maligo sa ilog na ‘yan, subalit ngayon lang siya nakasama sa kanyang mga kalaro, napakasakit sa akin bilang ina ang mawalan ng anak, pero kailangang tanggapin, kabayanihan ang kanyang ginawa," pahayag ng ina ng biktima. (Victor P. Martin)