Mister todas sa holdaper

CAVITE – Isang 49-anyos na mister ang iniulat na nasawi makaraang barilin ng isa sa tatlong holdaper sa naganap na karahasan sa Barangay Aniban 1 sa bayan ng Bacoor, Cavite kamakalawa ng gabi.

Napuruhan sa katawan ang biktimang si Homerto Riomalos ng nabanggit na barangay, samantalang ang tatlong holdaper na pawang naka-bonnet ay nakatakas lulan ng kulay pulang motorsiklo.

Sa pagsisiyasat ni PO3 Henry Arasga, sakay ng pedicab ang biktima kasama ang kanyang misis na si Agnes nang harangin ng motorsiklo ng mga holdaper.

Dalawa sa holdaper ang bumaba ng motorsiklo at tinangkang agawin ang dalang bag ng mag-asawa, subalit nanlaban ang biktima.

Napag-alamang nagalit ang isa sa mga holdaper kaya napilitang birilin at mapatay ang biktima bago nagsitakas sa hindi nabatid na direksyon. (Cristina Timbang)